Քաղաքացիական հասարակության երեք կազմակերպություններ՝ Արմավիրի զարգացման կենտրոնը Արմավիրի մարզում, Մարտունու կանանց համայնքային խորհուրդը Գեղարքունիքի մարզում և Սոսե կանանց հիմնախնդիրներ ՀԿ-ն Սյունիքի մարզում հաջողությամբ ամփոփեցին 2023 թ-ի հունիսից 2024 թ-ի փետրվարն իրականացված իրազեկման ծրագրերն ու արշավները։ Վերջիններս իրականացվել են Եվրոպայի խորհրդի «Կանանց նկատմամբ բռնության հաղթահարումը և գենդերային հավասարության ամրապնդումը Հայաստանում» ծրագրի ֆինանսավորմամբ՝ դրամաշնորհային մրցույթի հրավերի շրջանակներում ։
Ծրագրերն ուղղված էին ընտանեկան և գենդերային բռնության, «Կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին» Եվրոպայի խորհրդի կոնվենցիայի (Ստամբուլյան կոնվենցիա) արժեքների, նպատակների և դրույթների վերաբերյալ հայ հասարակության իրազեկվածության բարձրացմանը: Իրազեկման արշավներն իրականացվել են Եվրոպայի խորհրդի Գենդերային հավասարության բաժնի, Կանայք ընդդեմ բռնության եվրոպական ցանցի (WAVE) և «ՄԱԿ-կանայք» կառույցի կողմից մշակված մեթոդաբանության հիման վրա։
Հանրության առավել լայն շրջանակների ներգրավման նպատակով իրազեկումներն իրականացվել են տարբեր մեդիա հարթակների միջոցով, այդ թվում՝ սոցիալական լրատվամիջոցների, փոդքասթերի, տպագիր նյութերի, հեռուստատեսային հաղորդումների և հանդիպում-քննարկումների ձևաչափով՝ ընդգրկելով ավելի քան 196 008 անձի։ Ծրագրերի բազմաթիվ մասնակիցներ, ներառյալ առողջապահության և կրթության ոլորտի մասնագետները, իրավապահ մարմինների ծառայողները, տեղական իշխանությունների ներկայացուցիչները, համայնքային աշխատողները, ակտիվիստները, իրավաբանները, ընտանեկան բռնություն վերապրած անձինք, երիտասարդները և համայնքների շահագրգիռ անդամները ընդգծել են իրազեկման արշավների մեծ ազդեցությունը և կարևորել կանանց անվտանգության և բարօրության ապահովման նպատակով օրենսդրութան հետագա բարելավման և ջանքերի համախմբման անհրաժեշտությունը:
Արմավիրում իրականացված իրազեկման արշավի մասնակից ուսուցիչներից մեկը նշել է. «Նախկինում ես սխալ պատկերացումներ ունեի Ստամբուլյան կոնվենցիայի վերաբերյալ, բայց սեմինարին մասնակցելուց հետո ես հասկանում եմ դրա կարևորությունը կանանց իրավունքների պաշտպանության գործում: Այժմ ես պատրաստ եմ կիսվել ձեռք բերված գիտելիքներով իմ համայնքի մյուս անդամների հետ»:
Լրացուցիչ տեղեկությունների համար տե՛ս Կանանց նկատմամբ բռնության և ընտանեկան բռնության կանխարգելման և դրա դեմ պայքարի Եվրոպայի խորհրդի կոնվենցիայի վերաբերյալ Հայաստանի քաղաքացիական հասարակության իրզեկման ծրագրերը և արշավները՝ Եվրոպայի խորհրդի երևանյան գրասենյակ (coe.int)։