2024 թվականի մայիսի 23-ին ՀՀ Ազգային ժողովի, դատախազության, քննչական կոմիտեի, վճռաբեկ դատարանի, ներքին գործերի, աշխատանքի և սոցիալական հարցերի, արդարադատության, առողջապահության, կրթության, գիտության, մշակույթի և սպորտի նախարարությունների, ինչպես նաև քաղաքացիական հասարակության կազմակերպությունների ներկայացուցիչների մասնակցությամբ կայացավ կլոր սեղան քննարկում ուղղված ընտանեկան բռնության դեմ պայքարի ազգային օրենսդրության վերջին փոփոխություններին: Այս քննարկումը միայն առաջին քայլն է ուղղված Հայաստանում ընտանեկան բռնության օրենսդրական բարեփոխումների վերաբերյալ հետագա համակողմանի քննարկումներին և արդյունավետ համագործակցության ձևավորմանը։
Վերոնշյալ օրենսդրական փոփոխությունները, որոնք ուժի մեջ կմտնեն 2024 թվականի հուլիսի 1-ից, նախատեսում են մի շարք հասկացություններ հստակեցում և նոր հասկացությունների ամրագրում՝ քրեական օրենսդրության և վերաբերելի կարգավորումնեի հետ ներդաշնակեցման, ինչպես նաև միջազգային չափանիշների ապահաովման համար, մասնավորապես՝ «Կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին» Եվրոպայի խորհրդի կոնվենցիային։
Մասնակիցները քննարկեցին օրենսդրական փոփոխություններով պայմանավորված կիրարկման ռազմավարությունը, քրեադատավարական գործընթացներում հնարավոր և անհրաժեշտ փոփոխությունները, ինչպես նաև զոհերին տրամադրվող աջակցության և պաշտպանության նոր մեխանիզմները: Քննարկման առարկա էին նաև համապատասխան ենթաօրենսդրական ակտերի ընդունման անհրաժեշտությունը, ներքին կանոնակարգերի բարելավումը և միջգերատեսչական համագործակցության ընդլայնումը, այդ թվում՝ աջակցության ծառայությունների և քաղաքացիական հասարակության կազմակերպությունների հետ:
«Այս քննարկումը շատ կարևոր է պաշտոնատար անձանց և ծառայողներին ընտանեկան բռնության գործերի արդյունավետ քննությանը նախապատրաստելու և օրենսդրական փոփոխությունների անխափան և արդյունավետ կիրարկումն ապահովելու համար: Մենք մտադիր ենք շարունակել քննարկումներն ու համագործակցությունը, որպեսզի թե՛ ոստիկանության ծառայողներին, թե՛ մյուս գործընկերներին տրամադրենք հարթակ քննարկելու անհրաժեշտ ներքին կանոնակարգերի ու մեխանիզմների ներդրման, օրենսդրության կիրարկման վերաբերյալ առկա մտահոգությունների և քննարկման ենթակա այլ հարցերի բարձրաձայնման համար՝ սերտորեն համագործակցելով բոլոր համապատասխան գերատեսչությունների և քաղաքացիական հասարակության կազմակերպությունների հետ ՝ զոհերի արդյունավետ պաշտպանությունն ապահովելու համար», - հայտարարեց է ՀՀ ներքին գործերի նախարարության ոստիկանության անչափահասների հանցավորության և ընտանիքում բռնության կանխարգելման վարչության պետ՝ Էդգար Պետրոսյանը։
Քննարկումն իրականացվեց Եվրոպայի խորհրդի «Կանանց նկատմամբ բռնության հաղթահարումը և գենդերային հավասարության ամրապնդումը Հայաստանում» ծրագրի շրջանակներում ՝ ՀՀ ոստիկանության հետ համագործակցությամբ: