2024թ. հունիսի 14-15-ը Ծաղկաձոր քաղաքում տեղի ունեցավ երկօրյա դասընթաց՝ նվիրված կանանց նկատմամբ բռնության և ընտանեկան բռնության դեմ պայքարի ուղղությամբ 24 քննիչների կարողությունների կատարելագործմանը և ոլորտային օրենսդրական փոփոխությունների ներկայացմանն ու արդյունավետ կիրարկման նախապատրաստմանը։
Դասընթացի ընթացքում քննիչներն ուսումնասիրեցին գենդերային հիմնարար սկզբունքները և դրանց նշանակությունն ու ազդեցությունը քննչական գործողություններում: Ներկայացվեցին նաև միջազգային ստանդարտները և լավագույն փորձը, ներառյալ պետության պարտավորությունները, այդ թվում՝ Եվրոպայի Խորհրդի «Կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին» կոնվենցիայի (Ստամբուլյան կոնվենցիա) դրույթները և գործնական քննարկումներ ծավալվեցին Մարդու իրավունքների եվրոպական դատարանի կողմից քննված գործերի շուրջ։ Քննարկումների հիմնական նպատակն էր իրականացնել լավագույն փորձի փոխանակում՝ կանանց նկատմամբ բռնության և ընտանեկան բռնության գործերով արդյունավետ քրեադատավարական մեխանիզմների ապահովման ուղղությամբ: Ընդգծվեցին նաև ոլորտային ազգային օրենսդրության փոփոխություններն ու միջազգային չափանիշների ներդրումը, այդ թվում՝ զոհակենտրոն մոտեցումների ամրապնդումը ազգային օրենսդրության մեջ։ Կարևորվեց նաև միջգերատեսչական համագործակցությունն ու հասարակական կազմակերպությունների ու հոգեբանների ներգրավման դերը:
Դասընթացի կարևորությունը արձագանք գտավ նաև մասնակիցների խոսքում։ «Այս թեման շատ կարևոր է, և այս երկու օրերի ընթացքում ձեռք բերված գիտելիքները կնպաստեն ընտանեկան բռնության դեպքերի քննության ընթացքում համապատասխան մոտեցումների ձևավորմանը, միջազգային և ազգային փորձագետների կողմից ներկայացված թեմաներն ու քննարկումները, որոնք նվիրված էին միջազգային ստանդարտներին և լավագույն փորձին, ինչպես նաև բարոփոխված օրենսդրությանը և զոհերի հետ աշխատելու մեթոդներին, ինձ զինեցին նոր գործիքներով, որոնք անհրաժեշտ են արդյունավետ կիրարկման համար», - նշեց Լոռիից մասնակից քննիչը:
Նախաձեռնության նպատակն է խթանել հայաստանյան քննիչների կարողությունների զարգացումը և ձևավորել առավել արդար և անկողմնակալ միջավայր ընտանեկան բռնության և կանանց նկատմամբ բռնության զոհերի համար: Ակնկալվում է, որ դասընթացի արդյունքում ձեռք բերված հմտություններն ու գիտելիքները երկարաժամկետ ազդեցություն կունենան մասնակիցների մասնագիտական պրակտիկայի վրա և զգալի ներդրում կունենան Հայաստանում կանանց նկատմամբ բռնության և ընտանեկան բռնության դեմ պայքարում, ինչպես նաև կօժանդակեն բարոփոխված օրենսդրության անխափան կիրարկմանն ու համագործակցային հարաբերությունների հաստատմանը։
Դասընթացը կազմակերպվել էր Եվրոպայի խորհրդի «Կանանց նկատմամբ բռնության հաղթահարումը և գենդերային հավասարության ամրապնդումը Հայաստանում» ծրագրի շրջանակներում՝ ՀՀ քննչական կոմիտեյի հետ համագործակցությամբ։
