Կոռուպցիայի դեմ պայքարի միջազգային օրվան ընդառաջ, որը նշվում է ամեն տարի դեկտեմբերի 9-ին, Եվրոպայի խորհրդի կոռուպցիայի դեմ պայքարող պետությունների խմբի (ԳՐԵԿՈ) նախագահ Մարին Մրչելան հանդես է եկել հետևյալ հայտարարությամբ.
«Բնապահպանական հանցագործությունները, որոնք սովորաբար պայմանավորված են հանցագործների կողմից ստացվող վիթխարի անօրինական ֆինանսական շահույթով, հաճախ բխում են կոռուպցիոն գործելակերպից, այդ թվում նաև կաշառակերությունից և բարձրաստիճան պետական պաշտոնյաների, քաղաքական գործիչների և իրավապահ մարմինների վրա ոչ համապատասխան ազդեցությունից: Մտահոգիչ է նաև այս ոլորտում մասնավոր հատվածում գոյություն ունեցող կոռուպցիան:
«Խոսքը վերաբերում է ապօրինի անտառտնտեսությանը, ապօրինի ձկնորսությանը, վայրի կենդանիների ապօրինի առևտրին, ապօրինի հանքարդյունաբերությանը, թափոնների ապօրինի կառավարմանը, վտանգավոր թափոնների ապօրինի տեղափոխմանը, ի թիվս այլ ապօրինի գործողությունների: Դրանք անուղղելի վնաս են հասցնում բնական ռեսուրսներին, առողջ շրջակա միջավայր ունենալու քաղաքացիների իրավունքին և ապագա սերունդների իրավունքներին։
«Կոռուպցիան հնարավոր է դարձնում իրականացնել բնապահպանական հանցագործություններ։ Պետությունները պետք է բարձրացնեն իրենց որոշումների և օրենսդրության ընդունման գործընթացների թափանցիկությունը այնպիսի ոլորտներում, ինչպիսիք են ռեսուրսների օգտագործումը, թույլտվությունների և զիջումների, հավաստագրերը տրամադրման և կիրարկման գործընթացները, ինչպես նաև բնապահպանական ստուգումները: Աղտոտման իրավունքը և համապատասխան գործողությունները պետք է խստորեն կարգավորվեն, և իշխանությունները պետք է զգոն լինեն այս ուղղությամբ հնարավոր չարաշահումների նկատմամբ: Կոռուպցիայի կանխարգելման միջոցառումները նույնպես կարևոր են որպես այսպես կոչված կանաչ անցումային ոլորտի համար, որտեղ մեծ գումարներ են ներդրվում:
«ԳՐԵԿՈ-ի առաջարկություններն իր անդամ երկրներին լիովին կիրառելի են շրջակա միջավայրի ոլորտում կոռուպցիայի դեմ պայքարի ուղղությամբ։ Դրանք ներառում են այնպիսի միջոցառումներ, ինչպիսիք են լոբբինգը, պետական գնումները, թույլտվությունների ընթացակարգերի համարժեք կարգավորումը և դրանց արդյունավետ իրականացումը, ինչպես նաև ազդարարների պաշտպանությունը: Օրենսդրական գործընթացի թափանցիկությունը, այդ թվում նաև հանրային խորհրդակցությունների, մասնակցային իրավունքի և հանրային տեղեկատվության իրավունքի նկատմամբ հարգանքը կարևոր են չարաշահումները կանխելու համար:
«Քրեական իրավունքի միջոցով շրջակա միջավայրի պաշտպանության մասին կոնվենցիան, որը ներկայումս մշակվում է Եվրոպայի խորհրդի կողմից, թույլ կտա պետություններին ունենալ արդյունավետ գործիքակազմ՝ հանցագործներին հետապնդելու, այդ հանցագործությունների անպատժելիությանը հակազդելու և շրջակա միջավայրի ռեսուրսներն ավելի լավ պաշտպանելու համար:
«Պետությունները պետք է վճռական քայլեր ձեռնարկեն բնապահպանական կոռուպցիայի դեմ պայքարը քաղաքականության առաջնահերթություն դարձնելու համար: Բնապահպանական ոլորտում կոռուպցիոն գործելակերպը, ի վերջո, հանգեցնում է աշխարհի բնական ռեսուրսների նվազեցմնաը։ Մենք չպետք է թողնենք նման ժառանգություն մեր երիտասարդներին և ապագա սերունդներին»: