ԵԽԽՎ-ն այսօր ողջունել է Հայաստանի կողմից Վենետիկի հանձնաժողովի առաջարկություններին համապատասխան իրականացվող ընտրական բարեփոխումները՝ համարելով, որ իրական ժողովրդավարական ընտրություններ անցկացնելու նպատակը մեծապես իրականացվել է։
Միաձայն ընդունելով Կիմմո Կիլյունենի (Ֆինլանդիա, SOC) և Բորիանա Աբերգի (Շվեդիա, EPP/CD) զեկույցի հիման վրա բանաձևը, ԵԽԽՎ-ն նաև մատնանշել է Հայաստանի իշխանությունների շարունակական ջանքերը՝ բարելավելու դատական կառավարման համակարգը եվրոպական չափանիշներին համապատասխան և Եվրոպայի խորհրդի հետ սերտ համագործակցությամբ։ ԵԽԽՎ-ն նաև բարձր գնահատեց «իշխանությունների իրական վճռականությունը՝ պայքարելու համակարգային կոռուպցիայի դեմ»։
Ցավով հայտնելով քաղաքական մթնոլորտի չափազանց բևեռացման մասին՝ Խորհրդարանական վեհաժողովը խրախուսեց բոլոր քաղաքական շահագրգիռ կողմերին «երկխոսության մեջ մտնել խորհրդարանական մեծամասնության և ընդդիմության միջև [...] հարաբերությունների բարելավման շուրջ», մասնավորապես՝ նշանակման ընթացակարգերը անկախ կոլեգիալ մարմիններին և գերատեսչություններին ապաքաղաքականացնելու նպատակով։
Հայաստանում ժողովրդավարական ինստիտուտների գործունեության մասին ԵԽԽՎ 2427 (2022) բանաձևի ընդունումից ի վեր արձանագրված առաջընթացի շարքում ԵԽԽՎ-ն կարևորեց տեղեկատվության և հանրային տեղեկատվության ազատության մասին օրենքի նոր նախագիծ ներկայացնելու որոշումը, զրպարտության քրեականացման վերացումը, Մարդու իրավունքների և հիմնարար ազատությունների պաշտպանության մասին կոնվենցիայի թիվ 13 արձանագրության վավերացումը, որը վերաբերում է մահապատժի վերացմանը բոլոր հանգամանքներում և Ադրբեջանի հետ խաղաղության պայմանագրի բանակցությունների ընթացքը:
Հաշվի առնելով այս առաջընթացը, մասնավորապես ընտրական իրավունքի ոլորտում, ԵԽԽՎ-ն որոշեց շարունակել մոնիտորինգի ընթացակարգը՝ հատկապես կարևորելով արդարադատության համակարգի, ԶԼՄ-ների և խոսքի ազատության ոլորտում բարեփոխումների իրականացումը։