Մայիսի 14-ից 17-ը, Երևանում Եվրոպայի խորհրդի գրասենյակի նորանշանակ ղեկավար, Մաքսիմ Լոնգանգեն հանդիպումներ ունեցավ ՀՀ կառավարության բարձրաստիճան ներկայացուցիչների և ԵԽ հիմնական գործընկերների հետ: Հանդիպումների այս փուլը ներառում էր ռազմավարական քննարկումներ և ծանոթություններ՝ խթանելու Եվրոպայի խորհրդի և ԵԽ երևանյան գրասենյակի հետ ապագա համագործակցությունը:
Մաքսիմ Լոնգանգեի օրակարգը ներառում էր հանդիպումներ ՀՀ Ազգային ժողովի փոխնախագահ Ռուբեն Ռուբինյանի, Ներքին գործերի նախարար Վահե Ղազարյանի, Սահմանադրական դատարանի նախագահ Արման Դիլանյանի, Գլխավոր դատախազ Աննա Վարդապետյանի, Մարդու իրավունքների պաշտպան Անահիտ Մանասյանի, Միջազգային իրավական հարցերով ներկայացուցիչ Եղիշե Կիրակոսյանի և Արդարադատության ակադեմիայի ռեկտոր Սերգեյ Առաքելյանի հետ։
Հանդիպումների ընթացքում Մաքսիմ Լոնգանգեն բարձր է գնահատել հայաստանյան գործընկերների հետ հաստատված ամուր աշխատանքային հարաբերությունները և վերահաստատել Եվրոպայի խորհրդի հանձնառությունը՝ աջակցելու Հայաստանի ժողովրդավարական և իրավական բարեփոխումներին, ինչպես նաև ապագա համագործակցությանը և ԵԽ Հայաստանի համար իրականացվող գործողությունների 2023-2026թթ. ծրագրի իրականացումը։