Ներքին գործերի նախարարության ձերբակալվածների պահման վայրերում ենթադրյալ վատ վերաբերմունքի դեպքերի արձանագրմանը նվիրված աշխատաժողովը տեղի ունեցավ հունիսի 5-ին։ Ներքին գործերի փոխնախարարի, պետական տարբեր մարմինների, այդ թվում՝ Առողջապահության նախարարության, Արդարադատության նախարարության, Գլխավոր դատախազության, Քննչական կոմիտեի, Մարդու իրավունքների պաշտպանի գրասենյակի, ինչպես նաև ոլորտային հասարակական կազմակերպությունների առանցքային ներկայացուցիչների ներկայությունը ընդգծեց լայն հետաքրքրություն և ընդհանուր հանձնառություն՝ կապված ոստիկանությունում պահվող անձանց նկատմամբ վերաբերմունքի հետ:
Աշխատաժողովի նպատակն էր համապատասխանեցնել տեղական փորձը միջազգային չափանիշներին` ապահովելով ենթադրյալ վատ վերաբերմունքի յուրաքանչյուր դրսևորման մանրակրկիտ արձանագրում և քննություն: Աշխատաժողովի օրակարգը համապարփակ էր և հիմնված էր ենթադրյալ վատ վերաբերմունքի դեպքերի արձանագրման միջազգային չափանիշների շուրջ: Փորձագետները և մասնակիցները քննարկեցին արձանագրությունները և լավագույն փորձը, որոնք պետք է կիրառվեն՝ ապահովելու համար մանրակրկիտ և թափանցիկ փաստաթղթավորում:
Եվրոպայի խորհրդի փորձագետները ներկայացրեցին առաջարկություններ ձերբակալվածների պահման վայրերում նման դեպքերի արձանագրման փաստագրելու արդյունավետ համակարգ ստեղծելու վերաբերյալ: Առաջարկվել է ստեղծել անկախ և թափանցիկ մեխանիզմ, որը համակարգված կերպով կարձանագրի և կանդրադառնա վատ վերաբերմունքի մասին հաղորդումներին: Ընդունելով միջազգային չափանիշները և ներդնելով արձանագրման կառուցվածքային համակարգ, Հայաստանը նպատակ ունի ամրապնդել մարդու իրավունքների պաշտպանությունը՝ ձերբակալված անձանց ցանկացած տեսակի վատ վերաբերմունքից պաշտպանելու համար:
Ներքին գործերի փոխնախարար Սարգսյանը շնորհակալություն է հայտնել Եվրոպայի խորհրդին նախարարությանը ցուցաբերած աջակցության համար։ Նա ընդգծել է, որ այս համատեղ ջանքերը նշանակալի քայլ են Հայաստանում ազատությունից զրկված անձանց համար արդարության և արժանապատվության ապահովման ուղղությամբ։
Միջոցառումը կազմակերպվել է Եվրոպայի խորհրդի կողմից իրականացվող «Ազատությունից զրկված անձանց իրավունքների պաշտպանության ամրապնդումը» ծրագրի շրջանակներում, որն օգնում է ազգային իշխանություններին էլ ավելի խորացնել քրեակատարողական բարեփոխումները, քրեակատարողական առողջապահությունը և ազատությունից զրկված անձանց մարդու իրավունքների պաշտպանությունը: Ծրագիրը ֆինանսավորվում է Եվրոպայի խորհրդի 2023-2026 թվականների՝ Հայաստանի համար գործողությունների ծրագրի շրջանակներում և իրականացվում է Եվրոպայի խորհրդի կողմից:
Կոնտակտներ