Ընթացող դատաիրավական բարեփոխումների շրջանակում «Աջակցություն դատաիրավական բարեփոխումների իրականացմանը Հայաստանում» ԳԼԿ III ծրագրի կողմից, Բարձրագույն դատական խորհրդի հետ սերտ համագործակցությամբ, կազմակերպվել է քաղաքացիական դատավարության, վարչական դատավարության և քրեական դատավարության օրենսդրական փոփոխություններին նվիրված հանրային քննարկումների շարք 2023թ․-ի ապրիլի 18-28-ը։ Հանրային քննարկումները ծառայեցին որպես հարթակ՝ միավորելով դատական իշխանության, գործադիր իշխանության, այլ պետական մարմինների, քաղաքացիական հասարակության ներկայացուցիչների, փաստաբանների, միջազգային գործընկերների և գիտնականների։

Նախագծերի փաթեթներն ուղղված են դատական համակարգի առջև ծառացած մի շարք խնդիրների լուծմանը, այդ թվում՝ դատարանների ծանրաբեռնվածության նվազեցմանը, ողջամիտ ժամկետում գործի քննության իրավունքի երաշխավորմանը և երկրում արդարադատության որակի բարձրացմանը։

Մասնավորապես, փոփոխությունների նպատակն է թեթևացնել վարչական դատարանի ծանրաբեռնվածությունը, բարձրացնել փոքր հայցապահանջներով քաղաքացիական գործերի արտադատական լուծման արդյունավետությունը, ստեղծել լրացուցիչ նախադրյալներ քաղաքացիական դատավարությունում մրցակցության և դատավարական խնայողության համար։ Բացի այդ, քրեական արդարադատության նոր օրենսդրության կիրառման արդյունքում վերհանված խնդիրների հիման վրա նախատեսվում են լուծումներ կամ գործող օրենսդրության լավարկում, այդ թվում՝ առաջարկվում է ներդնել ըստ համաձայնության գրավոր ընթացակարգով անձին տուգանքի դատապարտելու ինստիտուտը, ինչը կնվազեցնի դատարանների ծանրաբեռնվածությունը։ Ակնկալվում է, որ նման վարույթի կարգով քննարկման ենթակա կլինեն քրեական գործերի ընդհանուր թվի մոտ 38%-ը։

«Աջակցություն դատաիրավական բարեփոխումների իրականացմանը Հայաստանում» ծրագիրը համաֆինանսավորվում է Եվրոպական միության և Եվրոպայի խորհրդի կողմից Գործընկերություն հանուն լավ կառավարման (ԳԼԿ III) ծրագրային ձևաչափի շրջանակներում և իրականացվում է Եվրոպայի խորհրդի կողմից։