Ամեն տարի հունիսի 20-ին նշվում է Փախստականների համաշխարհային օրը՝ հարգելու և ոգեկոչելու փախստականներին ամբողջ աշխարհում: Այս օրը ընդգծում է նրանց իրավունքների և կարիքների պաշտպանության և ամրապնդման կարևորությունը, ովքեր ստիպված են եղել լքել իրենց տները տարբեր հանգամանքների պատճառով:
Այս առիթով Եվրոպայի խորհուրդը Երևանում 2024 թվականի հունիսի 17-ին կազմակերպել էր աշխատաժողով։ Միջոցառման նպատակն էր վերլուծել և անդրադառնալ փախստականների և տեղահանվածների առջև ծառացած մարտահրավերներին: Աշխատաժողովին մասնակցում էին կառավարության, ազգային և միջազգային կազմակերպությունների և այլ շահագրգիռ կողմերի ներկայացուցիչներ:
Աշխատաժողովի ընթացքում համակողմանի քննարկումներ են ծավալվել փախստականներին և տեղահանվածներին անդրադարձող տարբեր հարցերի շուրջ: Թեմաները ներառում էին Հայաստանում պաշտպանության և ինտեգրման ծառայությունների բացերի բացահայտում և այն մարտահրավերների ուսումնասիրությունը, որոնց բախվում են փախստականները՝ օգտվելու հիմնական ծառայություններից, ինչպիսիք են առողջապահությունը, կրթությունը, իրավաբանական օգնությունը և աշխատանքային զբաղվածությունը: Մասնակիցները նաև առաջարկեցին ռազմավարություններ և նախաձեռնություններ՝ բարելավելու հասանելիությունը Հայաստանում այս կարևոր ծառայությունների և հնարավորությունների համար:
Քննարկման հիմնական բանախոսներից էին Մարդու իրավունքների պաշտպան Անահիտ Մանասյանը, Միգրացիայի և քաղաքացիության ծառայության պետի տեղակալ Նելլի Դավթյանը, Փաստաբանների պալատի նախագահի տեղակալ Հարութ Ակլունցը, Բարձրագույն դատական խորհրդի Դատական դեպարտամենտի արտաքին կապերի բաժնի պետ Գոհար Հակոբյանը, ինչպես նաև տարբեր հասարակական կազմակերպությունների և միջազգային կառույցների ներկայացուցիչներ:
Միջոցառումը հարթակ հանդիսացավ առանցքային քննարկումներ սկսելու և գործողություններ ձևակերպելու համար՝ Հայաստանում փախստականներին ավելի արդյունավետ կերպով աջակցելու և ինտեգրելու համար:
Աշխատաժողովը կազմակերպվել է Եվրոպայի խորհրդի «Հայաստանում տեղահանված բնակչության համար մարդու իրավունքների պաշտպանության երաշխիքների ամրապնդում» ծրագրի շրջանակներում, որն իրականացվում է Եվրոպայի խորհրդի 2023-2026 թվականների Հայաստանի գործողությունների ծրագրի շրջանակներում: