Եվրոպայի խորհուրդը ՀՀ արդարադատության նախարարության հետ համագործակցությամբ գործարկեց բանտային առողջապահության համար հեռաբժշկության և էլեկտրոնային բժշկական համակարգի ծրագիրը։ Երևանում Եվրոպայի խորհրդի գրասենյակի ղեկավար Մարտինա Շմիդտը և ՀՀ արդարադատության նախարարի տեղակալ Արփինե Սարգսյանը «Քրեակատարողական բժշկության կենտրոն» ՊՈԱԿ-ում մասնակցեցին ծրագրի գործարկմանը։
Նոր էլեկտրոնային համակարգի երկու բաղադրիչները կապված են էլեկտրոնային բժշկական համակարգի և հեռաբժշկության հետ, որոնք նորարարական և առաջընթաց քայլ են հանդիսանում։ Հիմնական գաղափարը մշակվել է կարիքների գնահատման և Եվրոպայի խորհրդի ազգային և միջազգային փորձագետների ինտենսիվ համագործակցության արդյունքում։
Ծրագիրը ներդրվել և նախատեսվում է օգտագործվել Հայաստանի բոլոր 10 քրեակատարողական հիմնարկներում։ Էլեկտրոնային բժշկական համակարգը կապահովի փաստաթղթերի էլեկտրոնային շրջանառությունը և փաստաթղթավորման նկատմամբ միասնական մոտեցում, մինչդեռ հեռաբժշկության միջոցով կհաղթահարվի տարածության խոչընդոտները և կընդլայնվեն բարձր որակավորում ունեցող և մասնագիտացված բուժաշխատողներին հասանելիության հնարավորությունները և կբարելավվի ազատությունից զրկված անձանց առողջության խնամքի որակը։ Նոր ծրագիրը գործածելու հմտություններ ձեռք բերելու նպատակով բուժանձնակազմն անցել է մասնագիտացված դասընթացներ։
Հատկանշական է, որ զուգահեռաբար հեռաբժշկություն է ներդրվում նաև Հայաստանի հանրային առողջապահության համակարգում։
Ծրագիրը մշակվել և համակարգչային սարքավորումները ձեռք են բերվել Եվրոպայի խորհրդի «Առողջապահության և մարդու իրավունքների պաշտպանության ամրապնդումը Հայաստանի քրեակատարողական հիմնարկներում» ծրագրի շրջանակում, որն իրականցում է Եվրոպայի խորհրդի և ֆինանսավորվում է Եվրոպայի խորհրդի Հայաստանի համար իրականացվող գործողությունների 2019-2022թթ․ ծրագրի միջոցներով։