Մարդու իրավունքների եվրոպական դատարանում հաջող դատական քննությունը դյուրին չէ և իրավաբաններից պահանջում է ունենալ որոշակի հիմնարար գիտելիքներ դատարան դիմելու առանձնահատկությունների վերաբերյալ: «Ինչպես դիմել Մարդու իրավունքների եվրոպական դատարան» գրքի հայերեն տարբերակի հրատարակությունն արժեքավոր աղբյուր է իրավաբանների համար, քանի որ այն քայլ առ քայլ նկարագրում է, թե ինչպես պետք է գործեր ներկայացնել Եվրոպական դատարան` անդրադառնալով այնպիսի թեմաների, ինչպիսիք են նախնական դիմումի ներկայացումը, գործերի առաջնահերթությունների որոշումը, հաշտության համաձայնությունները, միակողմանի հայտարարությունները, պիլոտային վճիռները և գործերի հանձնումը Մեծ պալատի քննությանը:
Գրքի չորրորդ հրատարակությունը, որի հեղինակն է Մեծ Բրիտանիայի Միդլսեքս համալսարանի Իրավունքի դպրոցի մարդու իրավունքների ոլորտի անվանի պրոֆեսոր Ֆիլիպ Լիչը, ներառում է Եվրոպական կոնվենցիայի նյութական իրավունքի վերաբերյալ թարմացված, մանրակրկիտ, հոդված առ հոդված բացատրությունները։
2022 թվականի դեկտեմբերի 14-ին Եվրոպայի խորհուրդը և «Իրավունքի Եվրոպա միավորում» ԻՀԿ-ն հրատարակեցին «Ինչպես դիմել Մարդու իրավունքների եվրոպական դատարան» գրքի հայերեն տարբերակը՝ այն ներկայացնելով հավատարմագրված դիվանագիտական ներկայացուցիչների, դատական իշխանության, միջազգային և ազգային գործընկերների ուշադրությանը։
Իր հիմնական ելույթում պրոֆեսոր Ֆիլիպ Լիչը կարևորեց «փորձնական դատավճռի ընթացակարգ» ստեղծելու միջոցով մարդու իրավունքների համակարգային խախտումներին անդրադառնալուն ուղղված՝ Մարդու իրավունքների եվրոպական դատարանի կողմից ընդունված նոր մոտեցման նշանակալի կարևորությունը ստեղծելով, որը թույլ է տալիս բացահայտել լայնածավալ կառուցվածքային խնդիրների աղբյուրը, որոնց շարքում է անկատար օրենսդրությունը։ «Փորձնական վճիռների մեծամասնությունը վերաբերում է սեփականության իրավունքի և դատավարության չափազանց երկարատև լինելու վերաբերյալ վեճերին», - ասաց պրոֆեսոր Լիչը։
Անդրադառնալով գրքի հայերեն տարբերակի արդիականությանը հայկական համատեքստում՝ Սահմանադրական դատարանի դատավոր Վահե Գրիգորյանը նշեց, որ գիրքը կնպաստի հայ իրավաբանների իրավամտածողության զարգացմանը, քանի որ այն ներառում է մեծ ծավալի կարևոր տեղեկատվություն՝ ամենաթարմ փոփոխություններով հանդերձ։
Գրքի հայերեն թարգմանությունն իրականացվել է Ֆրիդրիխ Նաուման հիմնադրամի ֆինանսական աջակցությամբ։ Գրքի հայերեն տարբերակի հրատարակությունն իրականացվել է «Աջակցություն դատական բարեփոխումների իրականացմանը` Հայաստանում դատական իշխանության անկախության և արհեստավարժության ամրապնդումը» ծրագրի աջակցությամբ, որը ֆինանսավորվում է Եվրոպական միության և Եվրոպայի խորհրդի կողմից և իրականացվում է Եվրոպայի խորհրդի կողմից։