2024 թվականի ապրիլի 5-ից մայիսի 30-ը ՀՀ արդարադատության նախարարության, ՀՀ Մարդու իրավունքների պաշտպանի գրասենյակի և իրավապահ մարմինների տասներկու ներկայացուցիչներ հաջողությամբ ավարտեցին ատելության խոսքի դեմ պայքարի առցանց դասընթացը՝ Ռասիզմի և անհանդուրժողականության դեմ Եվրոպական հանձնաժողովի (ՌԱԵՀ) Ընդհանուր քաղաքականության թիվ 15 հանձնարարականը, որը տեղադրված է Եվրոպայի խորհրդի ՀԵԼՓ հարթակում։
Դասընթացը բաղկացած է ութ մոդուլներից, որոնք են՝
- Ատելության խոսքի սահմանում և վերհանում
- Հանրային իրազեկման բարձրացում և հակադարձ խոսքի օգտագործում
- Աջակցություն թիրախավորված անձանց
- Ինքնակարգավորում
- Լրատվամիջոցներ, համացանց և ատելության խոսք
- Վարչական և քաղաքացիական պատասխանատվություն
- Վարչական և այլ տեսակի տույժեր կազմակերպությունների դեմ
- Քրեական պատասխանատվություն և պատիժներ։
Ի լրումն հիմնական նյութերի՝ մասնակիցները ծանոթացան նաև հայկական համատեքստին հարմարեցված բազմապիսի նյութերի, մասնավորապես՝ ատելության խոսքի վերաբերյալ Հայաստանի իրավական և ինստիտուցիոնալ շրջանակի մասին ակնարկի, համապատասխան զեկույցների, հրապարակումների և նախադեպային իրավունքի վերաբերյալ տեղեկատվության։
Այս դասընթացը նշանակալի քայլ է ատելության խոսքի դեմ պայքարում Հայաստանի պետական մարմինների ներկայացուցիչների հմտությունների և գիտելիքների բարձրացման ուղղությամբ՝ խթանելու ավելի ներառական և հարգալից հասարակություն:
Այս դասընթացը Եվրոպական միության և Եվրոպայի խորհրդի «Գործընկերություն հանուն լավ կառավարման» համատեղ ծրագրի մի մասն է, որը համաֆինանսավորվում է Եվրոպական միության և Եվրոպայի խորհրդի կողմից և իրականացվում է Եվրոպայի խորհրդի կողմից՝ «Հավասարության խթանումը և խտրականության բացառումը Հայաստանում» ծրագրի շրջանակներում: