ევროპის საბჭოს პომპიდუ ჯგუფმა პროექტის ''ნარკოტიკების პრევენციის მხაარდამჭერი ქსელის განვითარება მშობლებისთვის და პროფესიონალებისთვის საქართველოში“ ფარგლებში, ევროპის ნარკოტიკებისა და წამალდამოკიდებულების მონიტორინგის ცენტრთან (EMCDDA) თანამშრომლობით და პარტნიორობით დაასრულა რეგიონული კასკადური ტრენინგები საქართველოს სკოლების დირექტორებისა და ადგილობრივი თვითმმართველობის ორგანოების (მუნიციპალიტეტების) წარმომადგენლებისთვის. ბოლო ტრენინგი ზესტაფონის მუნიციპალიტეტის წარმომადგენლებისთვის 2023  წლის 13-14 ნოემბერს გაიმართა.

ზესტაფონის გარდა, მიმდინარე წლის მაისი-ნოემბრის პერიოდში ტრენინგები ჩატარდა თბილისში, რუსთავში, გორში, თელავში, ახალციხეში, ბათუმში, ფოთში, ზუგდიდსა და ქუთაისში. ტრენინგის ფარგლებში ჯამურად სულ 80-მდე სკოლის დირექტორი და 70-მდე ადგილობრივი თვითმმართველობის ორგანოების და საკრებულოს წარმომადგენლები მონაწილეობდნენ.

ორდღიანი ტრენინგში გაერთიანებული იყო პრაქტიკული და თეორიული კომპონენტები და მოიცავდა ისეთ საკითხებს, როგორიცაა ფსიქოაქტიური ნივთიერებების ეპიდემიოლოგია და მისი მნიშვნელობა პრევენციისთვის, პრევენციის ენა, მტკიცებულებებზე დაფუძნებული მიდგომები, პრევენციის საერთაშორისო და ევროპული სტანდარტები (EDPQS). ტრენინგის ფარგლებში მონაწილეები ასევე გაეცნენ სკოლაზე, ოჯახსა და გარემოზე დაფუძნებული პრევენციის მეთოდებს, გაიგეს თუ როგორ უნდა ხორციელდებოდეს პრევენცია სამუშაო ადგილზე, მედიასა თუ თემში. სესიები ასევე დაეთმო პრევენციული ღონისძიებების ადვოკატირებას, მონიტორინგსა და შეფასებას.

ტრენინგის შინაარსი დიდწილად დაეყრდნო პრევენციის ევროპული კურიკულუმის (EUPC) ქართულ ვერსიას, რომელიც საქართველოში ევროპის ნარკოტიკებისა და წამალდამოკიდებულების მონიტორინგის ცენტრის (EMCDDA) მიერ ადაპტირდა 2022 წელს.

ტრენინგს უძღვებოდნენ ევროპის საბჭოს ექსპერტები, EMCDDA-ის მიერ აკრედიტებული პრევენციის ევროპულ კურიკულუმის (EUPC) ეროვნული ტრენერები - დარეჯან (ჯანა) ჯავახიშვილი და  მარიამ რაზმაძე.