საგანმანათლებლო დაწესებულების მანდატურის სამსახური ადამიანის უფლებების სწავლების სფეროში ტრენერთა მომზადებას განაგრძობს. ტრენინგები ევროპის საბჭოს მხარდაჭერით ოქტომბერში ორ ეტაპად, 15-17 ოქტომბერს და 18-20 ოქტომბერს, განხორციელდა. ტრენერთა ტრენინგი ადამიანის უფლებების თემაზე საქართველოს სხვადასხვა რეგიონებიდან საგანმანათლებლო დაწესებულების 28 მანდატურმა გაიარა.

საგანმანათლებლო დაწესებულების მანდატურები, როგორც თეორიული, ისე პრაქტიკული სწავლების გამოყენებით, დეტალურად გაეცნენ ისეთ საკითხებს, როგორიცაა: დისკრიმინაციული ქცევის ფსიქოლოგია: ბავშვთან ურთიერთობის თავისებურებები და არადისკრიმინაციული კომუნიკაცია; სიძულვილის ენა; ზღვარი გამოხატვის თავისუფლებასა და სიძულვილის ენას შორის; ევროპის საბჭოს ინსტრუმენტები ადამიანის უფლებების სწავლების სფეროში და სხვა.

ეს აქტივობა ხორციელდება პროექტის „თანასწორობის დაცვისა და დისკრიმინაციის დაუშვებლობის ეფექტური მექანიზმების ხელშეწყობა საქართველოში“ ფარგლებში.  პროექტი ფინანსდება საქართველოში 2020-2023 წლების ევროპის საბჭოს სამოქმედო გეგმის ფარგლებში.