სპეციალურმა საგამოძიებო სამსახურმა ევროპის საბჭოს მხარდაჭერით მიმდინარე წლის 13-14 ივლისს და 27 ივლისი-1 აგვისტოს პერიოდში 8 საინფორმაციო შეხვედრა ჩაატარა ადგილობრივ მაცხოვრებლებთან და სამოქალაქო საზოგადოების წარმომადგენლებთან კახეთის, აჭარის, სამეგრელოს და იმერეთის რეგიონებში. 

შეხვედრების უპირველეს მიზანს წარმოადგენდა ადგილობრივი მაცხოვრებლების ცნობიერების ამაღლება სპეციალური საგამოძიებო სამსახურის მანდატის და როლის თაობაზე, ასევე სერვისების ხელმისაწვდომობისა და არასათანადო მოპყრობის წინააღმდეგ ბრძოლაში ადამიანის უფლებების დაცვის უზრუნველყოფაზე. შეხვედრებზე სპეციალური საგამოძიებო სამსახურის მენეჯერებმა შეხვედრის მონაწილეებს მიაწოდეს შესაბამისი ინფორმაცია სამსახურის უფლებამოსილებისა და შეტყობინების სხვადასხვა მეთოდების მათ შორის ცხელი ხაზის თაობაზე. ინტერაქციის და თვალსაჩინოებისთვის შეხვედრის მონაწილეებს დაურიგდათ საინფორმაციო ბროშურები.

ღონისძიება ჩატარდა ევროპის საბჭოს პროექტის „ადამიანის უფლებების დაცვით საპოლიციო ზომების გატარება საქართველოში" ფარგლებში, რომელიც შექმნილია ეფექტიანი საპოლიციო ზომების, ადამიანის უფლებათა სტანდარტების შესაბამისად გატარებისთვის; დაკავებული პირების უფლებების და პოლიციის მიერ მათი მოპყრობის გაუმჯობესებისთვის; არასრულწლოვან მსხვერპლთა და დამნაშავეთა მოპყრობის შესახებ; პოლიციის მხრიდან სავარაუდო არასათანადო მოპყრობის ეფექტიანად გამოძიებისა და პოლიციის მხრიდან არასათანადო ქმედებების წინააღმდეგ ბრძოლის ეფექტიანი საშუალებებისთვის.

ვმუშაობთ ერთად ადამიანის უფლებების, დემოკრატიის და კანონის უზენაესობის მხარდასაჭერად.