23-25 ივნისს, ფესტივალის დღეებში Lisi Wonderland Freedom Village-ის ტერიტორიაზე განთავსებული ევროპის საბჭოს „ადამიანის უფლებების კუთხემ“ Open Air Tbilisi-ს სტუმრებს უმასპინძლა.
„ადამიანის უფლებების კუთხეში“ ევროპის საბჭოს ოთხმა პროექტმა ფესტივალის სტუმრებს შესთავაზა ინტერაქციული ღონისძიებები, რომელიც რამდენიმე თემას აერთიანებდა, მათ შორის: თანასწორობასა და მრავალფეროვნებას, დემოკრატიული კულტურის ჩამოყალიბების ხელშეწყობას ახალგაზრდებში და ფიზიკურ და მენტალურ ჯანმრთელობასთან დაკავშირებულ საკითხებს.
სტუმრებს შესაძლებლობა ჰქონდათ შეევსოთ ქვიზები, რომლის მეშვეობით მათ გაიგეს მეტი სექსიზმისა და გენდერული სტერეოტიპების, თანასწორობისა და მრავალფეროვნების, ცხოვრების ჯანსაღი წესის მნიშვნელობისა და მშობლების როლის შესახებ დემოკრატიული კულტურის განვითარების პროცესში. მოეწყო დისკუსიები მენტალურ და ფიზიკურ ჯანმრთელობასთან დაკავშირებით, ჩატარდა საოჯახო იოგას სესია და სამაგიდო თამაშები ბავშვებისთვის.
„ადამიანის უფლებების კუთხის“ ერთ-ერთი ცენტრალური ღონისძიება იყო თამაში „იპოვე დამალული განძი“, რომელიც მიჰყავდა მებო ნუცუბიძეს. თამაშის მონაწილეებმა უპასუხეს კითხვებს ევროპის საბჭოს თემებისა და ღირებულებების ირგვლივ. მონაწილე ხუთი გუნდიდან გამარჯვენა ერგო სამ გუნდს „პრატებს“, „ევროპას“ და „ერთიანობა მრავალფეროვნებაშია“, რომელთაც დემოკრატიის, თანასწორობისა და ევროპის საბჭოს ღირებულებების განსაკუთრებული ცოდნა და სისხარტე გამოავლინეს.
წელს პირველად, ევროპის საბჭომ ფესტივალის მონაწილეებს შესთავაზა უფასო მგზავრობა „თანასწორობის ავტობუსი“-თ, რომელმაც ტრანსპორტირების პარალელურად თანასწორობის საკითხებზე სადისკუსიო სივრცის ფუნქცია შეითავსა.
„ადამიანის უფლებების კუთხემ“ ევროპის საბჭოს ოთხი პროექტი გააერთიანა: ქალთა მიმართ ძალადობის აღსაკვეთად ინტეგრირებული მიდგომის ხელშეწყობა და გენდერული თანასწორობის გაძლიერება საქართველოში, თანასწორობის დაცვისა და დისკრიმინაციის დაუშვებლობის ეფექტური მექანიზმების ხელშეწყობა საქართველოში, ნარკოტიკების პრევენციის მხარდამჭერი ქსელის განვითარება მშობლებისთვის და პროფესიონალებისთვის საქართველოში, დემოკრატია იწყება სკოლაში- მოსწავლეების ჩართვა გადაწყვეტილების მიღების პროცესში სკოლასა და თემში.