2022 წლის 24-25 თებერვალს გაიმართა ორდღიანი სამუშაო ჯგუფის შეხვედრა, რომელიც დაეთმო პრევენციის ეროვნული მექანიზმის მონიტორინგის ინსტრუმენტის განახლებას, რათა მას მოეცვა საქართველოს პენიტენციურ დაწესებულებებში ნარკოდამოკიდებულების საკითხი. სამუშაო ჯგუფის შეხვედრას ესწრებოდნენ სახალხო დამცველის აპარატის წარმომადგენლები, მათ შორის პრევენციის ეროვნული მექანიზმის დეპარტამენტი და სპეციალური პრევენციული ჯგუფი.
სამუშაო ჯგუფის წევრებმა განიხილეს ევროპის საბჭოს საერთაშორისო კონსულტანტის მიერ შეთავაზებული რეკომენდაციები, მონიტორინგის ვიზიტების დროს გამოყენებული, არსებული ინსტრუმენტის გაუმჯობესებასთან დაკავშირებით. შეხვედრის შედეგად შემუშავდა განახლებული ინსტრუმენტი, რომელიც საშუალებას მისცემს პრევენციის ეროვნულ მექანიზმს სათანადოდ შეაფასოს, სხვა საკითხებთან ერთად, სასჯელაღსრულების დაწესებულებაში პატიმართა შეყვანისას ნივთიერების გამოყენების და დამოკიდებულების სკრინინგის პრაქტიკა, აბსტინენციის კრიზისის დროული მკურნალობის საკითხი, ოპიოიდების აგონისტებით მკურნალობის ხელმისაწვდომობა, ფსიქოსოციალური სერვისები, რომლებსაც სთავაზობენ ფსიქოაქტიური ნივთიერების მოხმარებით გამოწვეული აშლილობის მქონე პატიმრებს, აგრეთვე, გათავისუფლების შემდეგ, ზრუნვის უწყვეტობის საკითხი.
აღნიშნული სემინარი ორგანიზებული იყო პროექტის „ადამიანის უფლებებისა და ჯანდაცვის ხელშეწყობის გაძლიერება პენიტენციურ სისტემაში“ მიერ. პროექტი დაფინანსებულია საქართველოსთვის ევროპის საბჭოს სამოქმედო გეგმის ფარგლებში.
