ევროპის საბჭოს მიერ დაფინანსებული პროექტის „ფულის გათეთრებისა და ტერორიზმის დაფინანსების წინააღმდეგ ბრძოლა საქართველოში“ ფარგლებში ევროპის საბჭო მართავს სამუშაო შეხვედრას AML/CFT უწყებათშორისი საბჭოს სამუშაო ჯგუფის წევრებისათვის. შეხვედრა ორგანიზებულია საქართველოს ფინანსთა სამინისტროსთან თანამშრომლობით.
შეხვედრის მიზანია ევროპის საბჭოს ექსპერტის რეკომენდაციების გაცნობა, რომლებიც შემუშავდა ფულის გათეთრებისა და ტერორიზმის დაფინანსების რისკების შეფასების მიზნით შესაბამისი სახელმწიფო უწყებების მიერ შეგროვებული დოკუმენტების საფუძველზე. სამუშაო ჯგუფი, ასევე, განიხილავს დამატებითი ინფორმაციის შეგროვების საჭიროებებსა და პარამეტრებს, ეროვნული რისკების შეფასების პროცესის დასრულებისათვის საჭირო სამოქმედო გეგმასა და კონკრეტულ ვადებს. ევროპის საბჭოს ექსპერტი სამუშაო ჯგუფის წევრებს, ასევე, მიაწვდის ინფორმაციას ეროვნული რისკების შეფასების ანგარიშის ზოგადი სტრუქტურის შესახებ.
შეხვედრა წარმოადგენს ევროპის საბჭოს მიერ საქართველოს სახელმწიფო უწყებებისათვის განხორციელებული ტექნიკური დახმარების ნაწილს, რომელიც მიზნად ისახავს ქვეყნისათვის ეროვნული რისკების შეფასების პირველი დოკუმენტის შემუშავებაში დახმარებას და ორგანიზებულია პროექტის „ფულის გათეთრებისა და ტერორიზმის დაფინანსების წინააღმდეგ ბრძოლა საქართველოში“ (ევროპის საბჭოსა და ევროპის კავშირის პარტნიორობა კარგი მმართველობისათვის) ფარგლებში.