ევროპის საბჭო განაგრძობს საქართველოს იუსტიციის სამინისტროს სპეციალური პენიტენციური სამსახურის დახმარებას, ფსიქიატრიული ექთნების გადამზადების კუთხით, ფსიქიკური ჯანმრთელობის საკითხებზე.
ევროპის ბევრ ქვეყანაში ფსიქიატრიული ექთნები, როგორც კლინიცისტები, შემთხვევის მმართველი ექიმები, კლინიკური თუ პრაქტიკოსი ექთნები ცენტრალურ როლს ასრულებენ ფსიქიატრიულ დაწესებულებებში. ფსიქიატრიული ექთნის, როგორც მულტიდისციპლინური გუნდის წევრის, როლი არსებითია ფსიქიკური დაავადების მართვაში. სწორედ ამიტომ გადაწყდა სპეციალური პროგრამის შექმნა საქართველოს ფსიქიატრიული ექთნებისთვისაც. ტრენინგის პროგრამა, რომელიც 2017 წელს ევროპის საბჭოს ექპერტებმა შეიმუშავეს, 12 მოდულისგან შედგება და მიზნად ისახავს ექთნებისთვის საბაზისო თეორიული ცოდნის მიწოდებას ფსიქიკური ჯანმრთელობის საკითხების გარშემო.
კასკადური ტრენინგების პირველი ფაზა 19-24 ოქტომბერს საქართველოს იუსტიციის სამინისტროს პენიტენციური და პრობაციის სისტემის მოსამსახურეთა მომზადების ცენტრის ბაზაზე ჩატარდა. 6 დღის განმავლობაში და ამავე პროექტის ფარგლებში უკვე გადამზადებულმა 6 ექთანმა-ტრენერმა თავისი ცოდნა და გამოცდილება გაუზიარა საქართველოს პენიტენციურ დაწსებულებებში მომუშავე 15 სხვა ექთანს. კასკადური ტრენინგები გაგრძელდება დეკემბრის თვეში და კიდევ 30 ფსიქიატრიული ექთანი აღიჭურვება სათანადო ცოდნითა და უნარ-ჩვევებით.
ღონისძიება გაიმართა ევროპის საბჭოს პროექტის - „თავისუფლებააღკვეთილ პირთა ფსიქიკური ჯანმრთელობის გაუმჯობესება საქართველოში” - ფარგლებში, რომელიც ბულგარეთის, ლიხტენშტეინის სამეფოს, ნორვეგიის, სლოვაკეთის, შვედეთისა და ლიტვის კეთილი ნების შემოწირულობებით ფინანსდება და რომელიც საქართველოსთვის ევროპის საბჭოს 2016-2019 წლების სამოქმედო გეგმის ნაწილია.
ვმუშაობთ ერთად ადამიანის უფლებების, დემოკრატიისა და სამართლის უზენაესობის გასაუმჯობესებლად!
