На 16 јануари во Скопје, Одделението за образование организираше тркалезна маса „Квалитетно образование за сите“, во соработка со тимот на Роми и Патници и со присуство на Одделението за извршување на пресудите. Настанот се одржа како одговор на пресудата на Европскиот суд: Елмазова и други против Северна Македонија, во која се утврди дискриминација на учениците Роми поради нивната сегрегација во две државни основни училишта во кои составот на паралелките и наставата е претежно составена од деца Роми.
Експерти и претставници од централните и локалните институции, училиштата, Советот на Европа, националните институции за човекови права и граѓанското општество разговараа за конкретните мерки за справување со сегрегацијата во училиштата и за унапредување на интеграцијата на децата Роми во образованието, како и временската рамка потребна за имплементација на истите. Темите за кои се разговараше вклучуваа измени на Законот за основно образование и различни политички мерки со цел превенирање на проблемот. Дискусијата, исто така, се осврна и на препораките за спроведување на пресудата на Европскиот суд на локално и на училишно ниво, како и на сеопфатната програма за обука и мониторинг, фасилитирана од локални консултанти, а насочена кон 25те пилот училишта, вклучувајќи ги и двете училишта засегнати од пресудата.
Дискусиите се фокусираа на одржување на меѓуинституционална соработка во текот на процесот и обезбедување одржливи решенија за спречување на сегрегацијата во училиштата во иднина.
Согласно индикативната програма за работа за 2024 година, Комитетот на министри планира да ја прегледа пресудата за Елмазова и други на состанокот за човекови права во декември 2024 година.
Настанот беше организиран во рамките на проектот „Квалитетно образование за сите – Северна Македонија“, имплементиран од страна на Советот на Европа, а финансиран од Германија. Се спроведува во соработка со Министерството за образование и наука на Република Северна Македонија од декември 2022 до ноември 2025 година.