Пилотирањето на Модулот за индивидуален третман на радикализирани осудени лица започна во КПД Штип со поддршка и советување од страна на консултант на Советот на Европа.

Иницијативата која ќе биде со времетраење од 6 месеци вклучува примена на широк опсег на алатки и механизми за третман на насилни осудени лица кои се екстремисти, кои ќе им помогнат на посветените стручни лица кои работат во затворите да ги идентификуваат знаците на радикализација меѓу затворската популација, да ги проценат потребите на радикализираните осудени лица, да работат на нивно оттргнување од насилство и да ги подготват за отпуст.

Во текот на минатата година работната група која се состои од искусни лица вработени во затворскиот систем и претставници од Управата за извршување санкции беше поддржана од меѓународни консултанти во развивање на Програма за радикализирани осудени лица и насилни екстремисти, заедно со ревидирањето на деталните алатки за скрининг на насилни осудени лица и за проценка на ризикот и потребите.

Активноста е организирана во рамките на проектот „Јакнење на капацитетите на пенитенцијарниот систем и на надворешниот механизам за контрола на полицијата во Северна Македонија”, ко-финансиран од страна на Европската унија и Советот на Европа во рамките на програмата „Horizontal Facility за Западен Балкан и Турција 2019-2022” која ја спроведува Советот на Европа.