Dekabrın 7-də, Bakı şəhəri “BuolevardHotel” mehmanxanasında Azərbaycan Respublikasının Vəkillər Kollegiyası üzvlərinin növbəti konfransı keçirilmişdir.
Konfrans Azərbaycanın Respublikasının dövlət himni ilə açılmışdır.
Vəkillər Kollegiyası Rəyasət Heyətinin sədri müavini Aydın Axundov məlumat vermişdir ki, Konfransda Respublikanın müxtəlif bölgələrində fəaliyyət göstərən vəkil qurumlarının nümayəndələri və fərdi vəkillər, dövlət və qeyri-hökumət təşkilatları, habelə KİV nümayəndələri iştirak edirlər.
Konfransda Vəkillər Kollegiyası Rəyasət Heyətinin sədri müavini Aydın Axundov qurumun 2012-2017-ci illər ərzində fəaliyyəti ilə bağlı hesabat məruzəsi ilə çıxış etmişdir.
Sonra məruzə ətrafında çıxışlar olmuş, Vəkillər Kollegiyası Rəyasət Heyətinin fəaliyyəti qənaətbəxş qiymətləndirilmişdir.
Konfransda Vəkillər Kollegiyası Rəyasət Heyəti sədrinin seçkisi keçirilmişdir ki, vəkil Anar Bağırov seçkinin nəticəsinə görə Vəkillər Kollegiyası Rəyasət Heyətinin sədri seçilmişdir.
Bundan başqa, Vəkillər Kollegiyası Rəyasət Heyətinin sədr müavinləri, üzvləri, Vəkillərin İntizam Komissiyasının tərkibi müəyyən edilmiş, Komissiyanın sədri seçilmişdir.
Həmçinin seçkinin nəticələrinə dair protokollar, Vəkillər Kollegiyasının və vəkillik fəaliyyətini tənzimləyən bəzi sənədlərə əlavə və dəyişikliklər, habelə Vəkillər Kollegiyasının büdcəsi təsdiq olunmuşdur.
Konfransın yekununda Avropa Şurasının Ədalət Mühakiməsinin Səmərəliliyi üzrə Avropa Komissiyasının (CEPEJ) Vitse-prezidenti Ramin Qurbanovun “Məhkəmə fəaliyyətinin səmərəliliyinin artırılmasında yeni yanaşma: “e-məhkəmə” informasiya sistemi” mövzusunda, həmçinin Avropa Şurasının HELP Proqramının Azərbaycanda vəkillər üzrə əlaqələndiricisi Fərhad Nəcəfovun HELP Proqramına dair təqdimatlarının keçirilməsi də nəzərdə tutulmuşdur.
