Me datë 18-20 mars, 20 drejtues të stafit të burgjeve që përfaqësojnë gjithë IEVP-të në Shqipëri, ndoqën një trajnim mbi lidershipin dhe menaxhimin e burgjeve,  mbajtur nga dy konsulentë ndërkombëtarë të Këshillit të Evropës dhe Drejtuesi i Qendrës Shqiptare të Trajnimit për stafin e burgjeve.

Trajnimi kombinoi aspektet metodologjike me njohuritë e përmbajtjes, duke zhvilluar aftësitë e pjesëmarrësve për tema si menaxhimi pozitiv i burgjeve, lidershipi dhe vendimmarrja në kontekstin e institucioneve penitenciare, komunikimi efektiv, menaxhimi i burimeve materiale dhe njerëzore, të menduarit strategjik, organizimi dhe planifikimi etj. Një focus i veçantë u vendos në prezantimin e konceptit të klasifikimit të brendshëm, si instrumentet dhe modalitetet e nevojshme që do të ndihmojnë çdo IEVP të zbatojë këtë praktikë të re në Shqipëri.

Shërbimi penitenciar shqiptar ka miratuar zyrtarisht klasifikimin e brendshëm si një praktikë pozitive që rrit efikasitetin në menaxhimin e të burgosurve, duke parashikuar regjime të diferencuara e të incentivuara, duke i ndihmuar të burgosurit të përparojnë drejt rehabilitimit dhe riintegrimit të tyre në shoqëri. Në fund të trajnimit, ky koncept u përkthye në katër hapa praktikë që lehtësojnë rrugën drejt një zbatimi të suksesshëm. Shërbimi penitenciar shqiptar do të nisë me pilotimin e klasifikimit të brendshëm në katër burgje të sigurisë së lartë, duke filluar nga maji 2024.

Trajnimi u realizua në kuadër të programit të përbashkët të Bashkimit Evropian dhe të Këshillit të Evropës “Instrumenti Horizontal per Ballkanin Perendimor dhe Turqinë – Faza III”, dhe në veçanti projekti “Forcimi i Mbrojtjes së të Drejtave të Njeriut të Personave të Dënuar në Shqipëri".