Qasja e Këshillit të Evropës ndaj arsimit në kohë emergjencash dhe krize synon forcimin e rolit të edukimit për qëndrueshmërinë e komunitetit nëpërmjet gjashtë parimeve për ndërtimin e ekosistemeve arsimore të qëndrueshme.

"Paketa e instrumenteve EDURES, lidhur me edukimin në kohë emergjencash dhe krize” promovon një kuptim gjithëpërfshirës të rolit të arsimit në qëndrueshmërinë e komunitetit.

Takimi i parë i Grupit të Punës EDURES në Verona (4-6 shtator 2024) u krijua si një mundësi për shkëmbimin e praktikave më të mira midis dy projekteve pilot mbi paketën e instrumenteve EDURES të Këshillit të Evropës që po zbatohet aktualisht në Shqipëri, me fokus në zonat e Tiranës dhe Durrësit dhe në Itali, në rajonin autonom të Friuli Venezia Giulia.

Takimi synoi të nxiste sinergjitë dhe rrjetet midis përfaqësuesve të dy vendeve, në mënyrë që të arrihet qëllimi kryesor i projektit: sigurimi i cilësisë, arsimi gjithëpërfshirës në kohë emergjencash dhe krize dhe shkëmbimi i përvojave dhe zhvillimi në bashkëpunim i zgjidhjeve dhe praktikave më të mira, duke u fokusuar në përshtatjen e paketës së instrumenteve me kontekstin shqiptar, dhe për të angazhuar në mënyrë efektive aktorët e përfshirë në procesin e vetëvlerësimit dhe zhvillimit të strategjisë EDURES.

Pjesëmarrës në takimin e Grupit të Punës ishin përfaqësues nga institucione dhe organizata të ndryshme si Avokati i Popullit, Ministria e Arsimit dhe Sportit, Agjencia e Sigurimit të Cilësisë së Sistemit Arsimor Parauniversitar, Agjencia e Arsimit Parauniversitar, Kryqi i Kuq Shqiptar dhe Bashkia Durrës. Pjesëmarrësit nga Italia përfshinin figura kryesore nga Shërbimi i Arsimit, Udhëzimit dhe të Drejtës për Studim, Drejtoria Qendrore për Punësimin, Trajnimin, Arsimin dhe Familjen e Rajonit Autonom të Friuli Venezia Giulia, që po mbikëqyr zbatimin e pilotimit.

Pilotimi është një nismë e Departamentit të Arsimit të Këshillit të Evropës dhe do të zbatohet në bashkëpunim me shkollat e përfshira në projektin e Këshillit të Evropës “Forcimi i Edukimit për Qytetari Demokratike në Shqipëri”* dhe synon të nxjerrë në pah praktikat më të mira që ekzistojnë në Shqipëri.

*Projekti "Forcimi i Edukimit për Qytetari Demokratike në Shqipëri”, zbatohet nga Këshilli i Evropës dhe financohet nga Agjencia Suedeze për Zhvillim dhe Bashkëpunim Ndërkombëtar (Sida).