Një grup nxënësish të shkollës “Sami Frashëri” në Tiranë, të shoqëruar nga drejtues, mësues dhe përfaqësues të Ministrisë së Arsimit dhe Sportit patën rastin të vizitojnë në datat 27-29 qershor, zyrat e Këshillit të Evropës në Strazburg, për t’u njohur nga afër me Këshillin e Evropës.

Entuziatë dhe me kërshëri për të zgjeruar njohuritë mbi demokracinë dhe të drejtat e njeriut, të rinjtë dhe të rejat patën takime me Kreun e Departamentit të Arsimit në Këshillin e Evropës, z. Villano Qiriazi; Ambasadorin e Misionit të Përhershëm të Shqipërisë në Strasburg z. Dastid Koreshi; Shefen e Divizionit të Bashkëpunimit Ndërparlamentar në Asamblenë Parlamentare të Këshillit të Evropës, znj. Liri Kopaci Di Michele; me përfaqësues të Gjykatës Evropiane të të Drejtave të Njeriut, etj.

Pas prezantimeve, nxënësit u angazhuan në diskutime duke bërë pyetje konkrete për të mësuar më shumë për Këshillin e Evropës, punën dhe rrugëtimin e tij, por gjithashtu morën njohuri mbi iniciativat më të fundit të Këshillit të Evropës në lidhje më Edukimin për Qytetarinë Dixhitale. 

Nxënësit e shkollës “Sami Frashëri” ishin fitues të konkursit të videove Fake≠Fact organizuar në muajin shkurt nga projekti i Këshillit të Evropës, “Forcimi i Edukimit për Qytetari Demokratike në Shqipëri” në kuadër të nismës së Institutit Suedez Fake≠Fact.

Projekti i Këshillit të Evropës “Forcimi i Edukimit për Qytetari Demokratike në Shqipëri” financohet nga Agjencia Suedeze për Bashkëpunim dhe Zhvillim Ndërkombëtar, dhe vijon zbatimin që prej dhjetorit 2019 me synim pajisjen e nxënësve me njohuri, aftësi dhe kompetencat e nevojshme për të promovuar kulturën demokratike në shkollë dhe komunitet.