Edukimi profesional dhe trajnimi i vazhdueshëm janë aftësi të domosdoshme të cilat duhet të zhvillohen së bashku me përditësimin e legjislacionit. Për këtë qëllim më 6-7 nëntor 2017 u zhvillua në Tiranë një aktivitet dy ditor që synonte Trajnimin e Trajnerëve për gjyqtarë, prokurorë dhe profesionistë në tre fusha të ligjit. Ekspertët e fushës kanë punuar për hartimin e këtyre manualeve duke filluar nga muaji prill 2017. Këto manuale janë zhvilluar sipas metodologjisë HELP (Edukimi mbi të Drejtat e Njeriut për Profesionistët në Fushën e Ligjit) e cila mbështet vendet anëtare të Këshillit të Evropës për të zbatuar Konventën Evropiane për të Drejtat e Njeriut (Konventa) në nivel kombëtar. Qasja e përshtatur nxiti pjesëmarrjen aktive veçanërisht në diskutimet e rasteve studimore duke vënë në dukje  qasjet të ndryshme mbi legjislacionin kombëtar nga ana e gjyqtarëve, profesionistëve në fushën e ligjit dhe avokatëve.  Kjo thekson edhe më shumë nevojën për një bashkëpunim më të afërt midis institucioneve dhe harmonizimin e praktikave gjyqësore. 

Ky aktivitet solli bashkë 59 pjesëmarrës të cilët tashmë janë trajnerë të çertifikuar. Në një fazë të mëvonshme ata do të trajnojnë kolegët gjatë trajnimeve kaskadë, duke thelluar kështu aftësitë e gjyqtarëve, prokurorëve dhe profesionistëve në fushën e ligjit për të zbatuar standardet e Konventës në proceset legjislative dhe praktikat gjyqësore. 

Projekti “Mbështetja e mjeteve të brendshme efektive për zbatimin e vendimeve të Gjykatës Evropiane për të Drejtat e Njeriut” zbatohet nga Këshilli i Evropës në kuadër të skemës “Instrumenti Horizontal për Ballkanin Perëndimor dhe Turqinë", bashkëfinancuar nga Bashkimi Evropian dhe Këshilli i Evropës.