Aşağıdakı təqvim dünya üzrə insanların insan hüquqları ilə bağlı qeyd etdiyi günləri bir araya toplamaq üçün yenilənmiş cəhddir; hüquq mübarizləri təltif olunur, insan hüquqlarının pozuntuları xatırlanır və ümidlər və sevinc bayram edilir. Əsas tarixlər rəsmi BMT Beynəlxalq günləri, QHT-lər tərəfindən tanınan Dünya Günləri, tarixi hadisələrin ildönümləri və bəzi tanınmış insan hüquqları fəallarının ad günlərindən götürülmüşdür. Bu siyahı tamamlanmış və ya yekun siyahı deyil, başlanğıc nöqtə sayılmalı və buraya sizin xatırlanmalı olduğunu hesab etdiyiniz günlər əlavə edilməlidir. Təqvimin surəti çıxarıla və insan hüquqları məsələlərinə ilkin marağı oyatmaq üçün post-er kimi divara asıla bilər. Belə ki, bu təqvim insan hüquqlarının əhatə dairəsini və müxtəlifliyini olduqca yaxşı əks etdirir. İnsanları rəy bildirməyə dəvət edin: Qeyd olunan günlərin hamısı onlar üçün məna daşıyır? Hansı yerli və milli günləri buraya daxil etmək istəyərdilər? 2-ci fəsildəki hər məşğələ üçün bir əsas tarix müəyyən olunub. Təqvimin hazırlanmasında məqsəd onun illik insan hüquqları təhsili proqramının qurulması üçün vasitə kimi istifadə olunmasıdır. Hər həftə və ya ay üçün başlanğıc nöqtə “həmin mövzu üzrə” məşğələ ola bilər. Məsələn, 3 may, Dünya Mətbuat Azadlığı Günündə “Ön səhifə” məşğələsini və ya 25 noyabr, Qadınlara qarşı Zorakılığın Aradan qaldırılması üzrə Beynəlxalq Gündə “Ailədaxili işlər” məşğələsini edə bilərsiniz. Alternativ kimi, qrup həmin günlərdə başqa təşkilatlar tərəfindən təşkil olunan tədbirlərdə və ya fəaliyyətlərdə iştirak edərək “hərəkətə keçə” bilər, məsələn, 22 aprel Ətraf mühit Gününü ətraf mühit qrupu ilə qeyd etmək. Hərəkətə keçmək üçün bəzi ilkin fikirlərlə tanış olmaq istəyirsinizsə, Hər kəs Fərqli - Hər kəs Bərabər Təhsil Paketindəki “Fəaliyyətlərin A-Z-si” hissəsinə baxın. Effektiv iş aparmaq üçün məsləhətlər və göstərişləri bu kitabın 3-cü fəslindəki “Hərəkətə keçmək” hissəsindən oxuya bilərsiniz. İnsan hüquqları anlayışı hər il inkişaf etdiyi kimi, bu təqvim də inkişaf etməlidir. Siz – bu kitabın istifadəçiləri üçün çağırış ilin hər günündə insan hüquqlarını qeyd etmək üçün yeni yollar tapmaqdır.